OMM Redaksiyası
"Fransada etiraz aksiyalarının vəziyyətindən asılı olaraq iri şəhərlərin ayrı-ayrı rayonlarında komendant saatının tətbiqi davam etdiriləcək".
“Operativ Məlumat Mərkəzi-OMM” xəbər verir ki, bu sözləri ölkənin daxili işlər naziri Loran Nunes deyib.
Nazirin sözlərinə görə, yaxın günlərdə vəziyyətin əhəmiyyətli dərəcədə dəyişəcəyi gözlənilmir və komendant saatı tətbiq olunacaq.
O qeyd edib ki, qərarlar hər bir regionda ictimai asayişin pozulması riskləri nəzərə alınmaqla veriləcək.
Xatırladaq ki, oktyabrın 24-də Fransanın müxtəlif şəhərlərində həmkarlar ittifaqlarının və tələbə hərəkatlarının iştirakı ilə kütləvi etiraz aksiyaları keçirilib.
Oktyabrın 17-də baş verən iğtişaşlardan sonra Fransa Daxili İşlər Nazirliyi ictimai asayişin qorunmasına cəlb olunan polis və jandarm qüvvələrinin sayının 10 mindən 70 minə çatdırılacağını açıqlayıb. Bir sıra şəhərlərdə küçə aksiyaları qadağan edilib və komendant saatı tətbiq olunub.
Fransa Daxili İşlər Nazirliyinin məlumatına görə, oktyabrın 24-də keçirilən aksiyalarda 410 min nəfər iştirak edib. Ümumi Əmək Konfederasiyası (CGT) isə iştirakçıların sayının 800 min nəfər olduğunu açıqlayıb.
