Afət Ziyadqızı
Serbiya Respublikasında keçirilən növbədənkənar parlament seçkilərinin ilkin yekunlarına əsasən, hakim siyasi düşərgə məğlubiyyətini rəsmən etiraf edib. Sentyabr ayında seçki kampaniyasına rəhbərlik etmək məqsədilə dövlət başçısı vəzifəsindən istefa verən keçmiş prezident Aleksandar Vuçiç rəhbərlik etdiyi koalisiyanın seçkidə uduzduğunu bəyan edib.
"Operativ Məlumat Mərkəzi-OMM" xəbər verir ki, Vuçiç partiyasının seçki qərargahında çıxış edərək, səsvermənin nəticələri üzrə tələbə hərəkatının formalaşdırdığı müxalif seçki siyahısının qələbə qazandığını bildirib.
A.Vuçiç çıxışında seçkinin yekun mənzərəsini belə qiymətləndirib:
“Aydındır ki, biz bu parlament seçkisini uduzduq. Bizi gənclərin və tələbələrin etiraz siyahısı məğlub etdi. İlkin hesablamalara görə, onların Skupştinadakı (Serbiya parlamenti) 250 mandatdan 135-140-nı, bizim “Birləşmiş Serbiya” koalisiyamızın isə təxminən 105 mandatı əldə edəcəyi gözlənilir. Digər siyasi partiya və bloklar parlamentə daxil olmaq üçün tələb olunan seçki baryerini keçə bilməyiblər”, – deyə keçmiş prezident vurğulayıb.
Vuçiç seçki nəticələrini qəbul etdiyini, daxili siyasi sabitliyin qorunması naminə qalib gələn qüvvələrin yeni hökuməti formalaşdırmasına mane olmayacağını diqqətə çatdırıb.
Xatırladaq ki, Aleksandar Vuçiçin ikinci və son prezidentlik müddəti 2027-ci ilin mayında başa çatmalı idi. Lakin o, ölkədə yaranmış siyasi dinamika fonunda sentyabrın 27-də vaxtından əvvəl istefa verərək hakim Serbiya Tərəqqi Partiyasının seçki siyahısına rəhbərlik etməyə və növbədənkənar parlament seçkilərində rəsmi olaraq baş nazirliyə namizədliyini irəli sürməyə qərar vermişdi.
