OMM Redaksiyası
Bakıda qəzalı və köhnə binaların sökülərək yenilənməsi gündəmdədir. Bu prosesdə əsas meyar binanın yaşı deyil, texniki vəziyyəti və təhlükəsizlik riskləridir.
"Operativ Məlumat Mərkəzi-OMM" “AzTV”-yə istinadən xəbər verir ki, söküntü zamanı sakinləri ən çox maraqlandıran məsələlərdən biri isə veriləcək kompensasiyanın məbləğidir.
Sakinlərin sözlərinə görə, söküntü zəruridirsə, əsas şərt mülkiyyətçilərə ədalətli kompensasiyanın ödənilməsidir. Onlar bildirirlər ki, məbləğ əmlakın real dəyərinə uyğun müəyyənləşdirilməlidir.
Hansı ərazilərdə söküntü aparılacaq?
Paytaxtın Nəsimi rayonunda 30-a yaxın binanın sökülməsi nəzərdə tutulur. Söküntü planına Səməd Vurğun, Bülbül, Şamil Əzizbəyov, Mirzə İbrahimov, Cəlil Məmmədquluzadə və Sabit Rəhman küçələrindəki binalar daxildir.
Sabunçu, Binəqədi və Suraxanı rayonlarında da 150-dək binanın sökülməsi planlaşdırılır. Binəqədi rayonunda 1-ci Mədən, 2-ci Mədən və 3-cü Mədən küçələri, Ağa Nemətulla, Bağ və Ağasadıq Gəraybəyli küçələri də qeyd olunan ünvanlar sırasındadır.
Bundan başqa, Nərimanov, Yasamal, Xətai və Səbail rayonlarının ayrı-ayrı ərazilərində də yenilənmə işləri nəzərdə tutulur. Bəzi ünvanlarda işlərə başlanıldığı, digərlərində isə hazırlıq və qiymətləndirmənin aparıldığı bildirilir.
Kompensasiya necə hesablanır?
Ekspertin sözlərinə görə, kompensasiyanın müəyyənləşdirilməsi ilə bağlı müxtəlif yanaşmalar mövcuddur. Məbləğ yaradılmış komissiyanın qiymətləndirməsi və ya investorla sakinlər arasında qarşılıqlı razılaşma əsasında müəyyən edilə bilər.
Ekspert vurğulayıb ki, kompensasiya hesablanarkən sökülən binanın yerləşdiyi ərazidə, yaxud təxminən bir kilometr radiusda yerləşən yeni binalardakı mənzillərin bir kvadratmetrinin bazar dəyəri əsas götürülməlidir.
Bu baxımdan kompensasiyanın məbləği və hesablanma qaydası sakinlərin hüquqlarına birbaşa təsir göstərir.
Mülkiyyətçilərin hüquqları necə qorunur?
Hüquqşünasın sözlərinə görə, Azərbaycan Konstitusiyasının 29-cu maddəsi mülkiyyət hüququnu qoruyur. Onun sözlərinə görə, heç kəs məhkəmə qərarı olmadan mülkiyyətindən məhrum edilə bilməz. Dövlət ehtiyacları üçün əmlakın alınması isə qanunvericiliklə müəyyən edilmiş qaydada həyata keçirilməlidir.
Əmlakın alınması zamanı qanuni prosedurlara əməl olunması və mülkiyyətçilərin ədalətli kompensasiya hüququnun qorunması əsas şərtlərdəndir.
Beləliklə, köhnə və qəzalı binaların yenilənməsi zamanı təhlükəsizlik məsələləri ilə yanaşı, sakinlərin mülkiyyət hüquqlarının qorunması da vacibdir. Söküntü prosesinin gedişində kompensasiyaların hansı meyarlarla hesablanması və əmlakın real bazar dəyərinə uyğun müəyyənləşdirilməsi xüsusi əhəmiyyət daşıyır.
