Afət Ziyadqızı
Pakistan ABŞ ilə iqtisadi əməkdaşlığın genişləndirilməsi istiqamətində danışıqları intensivləşdirib.
“Operativ Məlumat Mərkəzi-OMM” xəbər verir ki, Pakistanın maliyyə naziri Məhəmməd Auranzebin Vaşinqtona səfəri çərçivəsində keçirilən görüşlərdə investisiya imkanları, inkişaf maliyyələşdirilməsi və beynəlxalq kapital bazarlarına çıxış məsələləri müzakirə olunub.
Bildirilib ki, Pakistan hazırda Beynəlxalq Valyuta Fondunun (IMF) 7 milyard dollarlıq proqramı çərçivəsində genişmiqyaslı iqtisadi islahatlar həyata keçirir. Nazir Məhəmməd Auranzeb ABŞ-ın maliyyə naziri Skott Bessent, ABŞ Beynəlxalq İnkişaf Maliyyə Korporasiyasının (DFC) rəsmiləri, “Honeywell Technologies” şirkətinin rəhbərliyi və bir sıra beynəlxalq bank qruplarının nümayəndələri ilə görüş keçirib.
Pakistan Maliyyə Nazirliyinin məlumatına görə, görüşlərdə ölkənin makroiqtisadi sabitləşmədən ixracyönümlü artım modelinə keçidi, beynəlxalq kapital bazarlarına çıxışın genişləndirilməsi, valyuta ehtiyatlarının möhkəmləndirilməsi və suveren kredit reytinqinin yüksəldilməsi məsələləri müzakirə edilib. Tərəflər iqtisadi əməkdaşlığın genişləndirilməsi və ABŞ investisiyalarının artırılması istiqamətində öhdəliklərini təsdiqləyiblər.
Məlumata əsasən, Pakistan növbəti üç il ərzində suveren istiqraz və sukuk buraxılışlarını dəstəkləmək məqsədilə beynəlxalq bank konsorsiumları ilə strateji tərəfdaşlığa başlayıb. Bu çərçivədə proqrama ilk dəfə olaraq “MUFG Securities Asia” və “Mashreq Bank” da cəlb edilib.
Bundan başqa, maliyyə naziri “Honeywell Technologies” rəhbərliyi ilə Pakistanın neft emalı sektorunun modernləşdirilməsi layihəsini müzakirə edib. Layihənin daxili emal gücünün artırılması və idxal olunan neft məhsullarından asılılığın azaldılmasına xidmət edəcəyi bildirilib. Həmçinin layihənin maliyyələşdirilməsi ilə bağlı ABŞ İxrac-İdxal Bankı və DFC-nin mümkün dəstəyi ətrafında ilkin müzakirələr aparılıb.
