“Beşiktaş” “İstanbul Başakşehir”ə 2:0 hesabı ilə qalib gəldi

Türkiyə Super Liqasının 9-cu turunda “Beşiktaş” doğma meydanda “İstanbul Başakşehir”i 2:0 hesabı ilə məğlub edib.

İlk hissədə hesab açılmayıb. 10-cu dəqiqədə Ndidinin zərbəsi qapıdan az fərqlə yan keçib. 17-ci dəqiqədə Vlahoviçin baş zərbəsindən sonra top dirəkdən qayıdıb. 26-cı dəqiqədə Ndidinin başla vurduğu top qapıdan kənara çıxıb. Fasilə ərəfəsində Olsenin zərbəsi də hədəfdən yayınaraq qolsuz bərabərliklə nəticələnib.

İkinci hissənin əvvəlində Kemenin zərbəsini Nübel küncə çıxarıb. 63-cü dəqiqədə Şomurodovun qüvvətli zərbəsini də qapıçı küncə yönəldib. 66-cı dəqiqədə Ohun uzaq məsafədən zərbəsini Muhammed Şengezer dəf edib.

“Beşiktaş” 76-cı dəqiqədə hesabı açıb. Vlahoviçin başla ötürməsindən sonra müdafiəçiləri qabaqlayan Oh qapıçıdan da yayınaraq topu boş qapıya göndərib. 80-ci dəqiqədə Poku fərqi artırmağa yaxın olsa da, Şengezer ayaqları ilə zərbəni qaytarıb.

89-cu dəqiqədə Olaitan cərimə meydançası qövsünün sağından uzaq küncə dəqiq zərbə vuraraq yekun hesabı müəyyənləşdirib: 2:0.