OMM Redaksiyası
Gürcüstanda keçirilən “WTT Youth Contender Tbilisi 2026” stolüstü tennis turnirində 25 ölkənin təmsilçiləri iştirak edib. Ötən həftə başa çatan beynəlxalq reytinq yarışında Azərbaycan millisinin çıxışını baş məşqçi Mixail Timofeyev dəyərləndirib.
Mütəxəssis bildirib ki, məşqçilər korpusu yarımfinal mərhələsində daha yaxşı nəticə gözləsə də, komandanın ümumi çıxışından razı qalıb. Onun sözlərinə görə, idmançıların buraxdığı səhvlər təhlil ediləcək və komanda növbəti yarışlara hazırlaşacaq.
Timofeyev şəxsi məşqçisi olduğu Onur Quluzadənin çıxışını da şərh edib. 15 yaşlı tennisçi turnirdə 19 yaşlı idmançılar arasında mübarizə aparıb. Baş məşqçi bildirib ki, Quluzadə bu yaş kateqoriyasında ilk dəfə belə yarışda iştirak edib. Komanda qalib gəlməyi planlaşdırsa da, nəticə gözləntiləri doğrultmayıb.
Timofeyevin sözlərinə görə, ayın sonunda Azərbaycanın böyüklərdən ibarət millisi Çində təlim-məşq toplanışına qatılacaq. Yeniyetmələrdən ibarət komanda isə Latviyada beynəlxalq turnirdə iştirak edəcək.
Azərbaycan idmançılarının dekabrda Finlandiyada keçiriləcək Açıq Çempionatda da çıxışı planlaşdırılır.
