OMM Redaksiyası
Bakıda keçirilən cüdo üzrə dünya çempionatında qızıl medal qazanan Azərbaycan idmançısı Əhməd Yusifov Prezident İlham Əliyevlə ötən gün baş tutan görüşü barədə paylaşım edib.
Yusifov “Instagram” hesabında dövlət başçısına onu qəbul etdiyinə, dünya çempionluğu münasibətilə təbrik etdiyinə və dəstək sözlərinə görə təşəkkürünü bildirib.
Cüdoçu doğma Bakıda, azarkeşlərin qarşısında Azərbaycan bayrağını yüksəltməyin və dünya çempionu olmağın onun üçün böyük qürur olduğunu yazıb. O, əldə olunan uğuru ölkədə idmana və idmançılara göstərilən diqqət və dəstəklə əlaqələndirib.
Yusifov qarşıdakı yarışlarda Azərbaycanı layiqincə təmsil etmək və yeni uğurlar qazanmaq üçün əlindən gələni edəcəyini qeyd edib.
Milli Gimnastika Arenasında təşkil olunan dünya çempionatı oktyabrın 11-də başa çatacaq. Yarışın ilk günündə 60 kq çəki dərəcəsində mübarizə aparan Yusifov qızıl medal qazanıb. Bu, Azərbaycan cüdo tarixində böyüklər arasında dünya çempionatlarında dördüncü qızıl medal, 60 kq-da isə ilk dünya çempionluğudur.
