OMM Redaksiyası
Bakıda keçirilən cüdo üzrə dünya çempionatının sonuncu günündə qarışıq komanda yarışı təşkil olunacaq. Milli Gimnastika Arenasında keçiriləcək yarışda 18 ölkədən 192 idmançı mübarizə aparacaq.
Azərbaycan millisi mübarizəyə 1/16 final mərhələsindən başlayacaq. Komandanın ilk rəqibi Avstriya olacaq. Bu mərhələni keçəcəyi təqdirdə yığma 1/8 finalda Yaponiya ilə üz-üzə gələcək.
Azərbaycan millisinin heyəti
Komanda yarışında altı çəki dərəcəsi üzrə qarşılaşmalar keçiriləcək. Kişilər 73, 90 və 90 kq-dan yuxarı, qadınlar isə 57, 70 və 70 kq-dan yuxarı çəki dərəcələrində çıxış edəcəklər.
Azərbaycan millisinin heyətinə 11 cüdoçu daxil edilib. Qadınlardan 57 kq-da Gültac Məmmədəliyeva və Xədicə Qədəşova, 70 kq-da Südabə Ağayeva və Hanna Zaytseva, 70 kq-dan yuxarı çəkidə Madina Kaisinova yarışacaq.
Kişilərdən 73 kq-da Rəşid Məmmədəliyev və Ruslan Paşayev, 90 kq-da Zelim Tçkayev və Süleyman Şükürov, 90 kq-dan yuxarı çəkidə isə Zelim Kotsoyev və Uşanqi Kokauri mübarizə aparacaqlar. Təsnifat mərhələsi Bakı vaxtı ilə saat 09:30-da, final bloku isə saat 18:00-da başlayacaq.
Azərbaycan millisi fərdi yarışları yeddi medalla başa vurub. Əhməd Yusifov qızıl, Zelim Tçkayev və Uşanqi Kokauri gümüş, Rəşid Məmmədəliyev, Ömər Rəcəbli, Murad Fətiyev və Kənan Nəsibov isə bürünc medal qazanıblar.
