OMM Redaksiyası
Yaponiyalı cüdoçu Sansiro Murao Bakıda keçirilən dünya çempionatında 90 kq çəki dərəcəsində qızıl medal qazanıb. O, finalda həmyerlisi Qoki Tayimanı məğlub edərək ardıcıl ikinci dəfə dünya çempionu olub.
Murao Azərbaycana üçüncü dəfə gəldiyini və hər səfərində xoş münasibətlə qarşılaşdığını bildirib. Cüdoçu Milli Gimnastika Arenasındakı ab-havanı və tamaşaçıların bu idman növünə sevgisini yüksək qiymətləndirib.
“Azərbaycanın çox gözəl və qonaqpərvər ölkə olduğunu düşünürəm. Xalqınıza təşəkkür edirəm”, – deyə Murao bildirib.
Yaponiyalı idmançı ötən il də dünya çempionu olduğunu xatırladaraq, qarşısına qoyduğu məqsədə çatdığı üçün xoşbəxt olduğunu söyləyib. O, ardıcıl qələbələrlə üstünlüyünü sübut etməyə çalışdığını qeyd edib.
Həmin çəki dərəcəsində mübarizə aparan Azərbaycan təmsilçisi Murat Fətiyev isə bürünc medal qazanıb.
