“Formula-2” 2027-ci ildə Azərbaycan Qran-prisində keçiriləcək

Beynəlxalq Avtomobil Federasiyası (FIA) “Formula-2” üzrə 2027-ci il mövsümünün təqvimini təsdiqləyib. Təqvimdə Bakı şəhər trekində keçiriləcək mərhələ də yer alıb.

Azərbaycan Qran-prisi çərçivəsində baş tutacaq “Formula-2” yarışı sentyabrın 24-26-da təşkil olunacaq. Bakı mərhələsi sentyabr ayında keçiriləcək üç yarış həftəsonunun sonuncusu olacaq. Pilotlar bundan əvvəl Monza və Madriddə mübarizə aparacaqlar.

2027-ci il mövsümündə dörd qitədə ümumilikdə 14 mərhələ keçiriləcək. Yarışlar mart ayında Bəhreynin Səhirdəki trekində başlayacaq, mövsüm isə dekabrda Birləşmiş Ərəb Əmirliklərinin Yas adasında yekunlaşacaq.

Təqvimə İstanbul və Mexiko şəhərləri də daxil edilib. Hər iki mərhələ oktyabrda baş tutacaq. 2026-cı ildə ilk dəfə “Formula-2” yarışına ev sahibliyi edən Monreal da yeni mövsümün təqvimində saxlanılıb. “Formula-2” mərhələləri “Formula-1” yarışlarının keçirildiyi həftəsonlarında təşkil olunur.