Afət Ziyadqızı
ABŞ rəsmiləri İranla müharibənin 2029-cu ilin yanvarına qədər davam edə biləcəyini ehtimal edirlər.
“Operativ Məlumat Mərkəzi-OMM” xəbər verir ki, “The Wall Street Journal”ın məlumatına görə, bu məsələ Oval Ofisdə və Ağ Evin Əməliyyatlar Otağında keçirilən müzakirələrdə gündəmə gətirilib. Görüşlər zamanı vitse-prezident Cey Di Vens və dövlət katibi Marko Rubio ABŞ Prezidenti Donald Trampa müvafiq qiymətləndirmələr təqdim ediblər.
ABŞ rəsmilərinin fikrincə, dəniz blokadası və hərbi əməliyyatlara baxmayaraq, Tehran administrasiyası Vaşinqtonun təzyiqlərinə müqavimət göstərməkdə davam edə bilər.
Bu qiymətləndirmə Donald Trampın müharibənin noyabr ayında keçiriləcək aralıq seçkilərdən dərhal sonra başa çatacağını və İranın daha uzun müddət davam gətirə bilməyəcəyini bildirməsindən sonra müzakirələri intensivləşdirib.
Tərəflər arasında qarşılıqlı cavab zərbələri də davam edir. İordaniyadakı “Muwaffaq Salti” aviabazasına gecə saatlarında endirilən zərbələr nəticəsində bəzi ABŞ hərbi təyyarələrinə ziyan dəyib.
Hücum zamanı “Warthog” kimi tanınan A-10 “Thunderbolt” təyyarəsi ağır zədələnib və onun qanadlarından biri qopub. Təxminən səkkiz F-15 qırıcısına isə yüngül zərər dəyib.
ABŞ qüvvələri baza və şəxsi heyəti qorumaq məqsədilə hücum zamanı 30-dan çox “Patriot” raketi buraxıb.
Qarşılıqlı misilləşmənin Vaşinqtonun İranla əlaqəli olduğu bildirilən beş tankerə qarşı keçirdiyi əməliyyatdan sonra baş verdiyi qeyd olunur.
