OMM Redaksiyası
Veteran futbolçu Vidadi Rzayev “Kəpəz”in bu mövsüm Misli Premyer Liqasındakı çıxışını dəyərləndirib. O, komandanın uğurlu nəticələrinin təsadüfi olmadığını deyib.
Rzayevin sözlərinə görə, çempionatın ilk turlarında “Kəpəz” istədiyi oyunu göstərə bilməyib. Bunun əsas səbəblərindən biri heyətin yenidən formalaşması və futbolçuların bir-birinə uyğunlaşması üçün vaxta ehtiyac yaranması olub.
Veteran futbolçu bildirib ki, komanda topladığı xallarla uğurlu nəticələrə layiq olduğunu göstərib. O, məşqçilər heyətinin futbolçularda döyüşkən ruh və mübarizə əzmi yaratmaqda rolunu qeyd edib. Rzayev əvvəlki oyunlarda futbolçuların təxminən 70-ci dəqiqədən sonra yorulduğunu və fiziki çətinlik çəkdiyini, bunun nəticələrə təsir göstərdiyini söyləyib.
Onun fikrincə, son turlarda bu problemin aradan qalxdığı görünür: futbolçular matçların son dəqiqələrində də mübarizəni davam etdirir və intizamlı oynayırlar. Rzayev sabitliyi qorumağın və hər növbəti qarşılaşmada daha yaxşı çıxış etməyin vacibliyini vurğulayıb.
“Kəpəz” Misli Premyer Liqasında səkkiz turdan sonra 14 xalla altıncı pillədə qərarlaşıb.
