OMM Redaksiyası
“Çox yaxşı və gərgin oyun alındı”. “Qarabağ”ın futbolçusu Jali Muaddib Misli Premyer Liqasının IX turunda səfərdə “Sabah”la qolsuz heç-heçə etdikləri qarşılaşma barədə belə deyib.
Fransalı yarımmüdafiəçi qələbəyə daha yaxın olduqlarını düşündüyünü, bununla belə, rəqibin də yaxşı oyun sərgilədiyini bildirib. Muaddib “Sabah”ı yaxşı komanda adlandırıb və göstərdikləri oyundan qürur duyduqlarını deyib. O, növbəti görüşdə rəqibə qalib gələcəklərinə ümid etdiyini sport24.az-a açıqlamasında qeyd edib.
Muaddib qol vurulmamasını hər iki komandanın müdafiədə və topsuz oyunda yaxşı çıxış etməsi ilə əlaqələndirib. Onun sözlərinə görə, “Qarabağ” başqa rəqiblərə qarşı da çox qol buraxmır, “Sabah” da eyni cür müdafiə olunur.
Futbolçu çempionluq uğrunda üç komandanın deyil, iki klubun sona qədər mübarizə aparacağını düşündüyünü bildirib. Onun fikrincə, “Qarabağ”la yanaşı, daha bir komanda titul uğrunda mübarizə aparacaq, digər rəqiblərdən biri isə onların ritmini izləyəcək. Muaddib çempionluq mübarizəsinin bu iki komandanın digər rəqiblərlə oyunlarında müəyyənləşəcəyini deyib.
