OMM Redaksiyası
Misli Premyer Liqasının IX turunda “Sabah” oktyabrın 25-də “Qarabağ”ı qəbul edəcək. Bakı vaxtı ilə saat 18:00-da Mərdəkandakı “Sabah Arena”da başlayacaq oyunu Rəşad Əhmədov idarə edəcək.
“Sabah” yeddi oyundan sonra 19 xalla turnir cədvəlinə başçılıq edir. Komanda bu matçlarda 18 qol vurub, bir qol buraxıb. Eyni sayda oyun keçirən “Qarabağ” 17 xalla üçüncü pillədədir. Hər iki komanda çempionatda məğlub olmayıb. “Neftçi” oktyabrın 24-də “Turan Tovuz”la 1:1 hesablı heç-heçə etdikdən sonra 18 xalla ikinci yerə yüksəlib. “Sabah” qələbə qazansa, “Qarabağ”la xal fərqini beşə çatdıracaq.
Komandalar çempionatda 30 dəfə qarşılaşıb: “Qarabağ” 15, “Sabah” dörd qələbə qazanıb, 11 oyun heç-heçə başa çatıb. Topların fərqi 54:30-dur. Ən böyükhesablı görüşdə, 2021-ci il dekabrın 4-də, “Qarabağ” evində 5:1 hesabı ilə qalib gəlib. “Sabah” ilk qələbəsini 2023-cü il aprelin 16-da 2:1 hesabı ilə əldə edib.
Son altı görüşdə “Qarabağ” qələbə qazana bilməyib: “Sabah” iki dəfə qalib gəlib, dörd oyun heç-heçə bitib. “Sabah” son 10 matçının hamısında qol vurub. Komandaların son oyunu 2026-cı il aprelin 18-də keçirilib və “Sabah” səfərdə 1:0 hesabı ilə qalib gəlib.
“Sabah” əvvəlki matçında Dortmund “Borussiya”sına 1:2 hesabı ilə uduzub, çempionatın son oyununda isə “Qəbələ”ni 4:0 məğlub edib. “Qarabağ” son matçında “Neftçi” ilə 3:3 hesablı heç-heçə edib.
