OMM Redaksiyası
Rusiyanın Yəhudi Muxtar Vilayətində sərnişin qatarının mikroavtobusla toqquşması nəticəsində altı nəfər ölüb, bir nəfər ağır yaralanıb. AnewZ-in məlumatına görə, hadisə oktyabrın 24-də baş verib.
Regional hökumətin bildirdiyinə görə, qəza Nikolayevka qəsəbəsi yaxınlığında, mikroavtobusun qırmızı işıq siqnalına baxmayaraq dəmiryol keçidinə daxil olması zamanı baş verib.
Mikroavtobusu Xabarovskdan Blagoveşenskə gedən sərnişin qatarı vurub. Qatarın maşinisti təcili əyləci işə salsa da, toqquşmanın qarşısını ala bilməyib.
Regional hakimiyyət orqanları mikroavtobusdakı yeddi nəfərin hamısının xarici vətəndaş olduğunu bildirib. Onlardan altısı hadisə yerində ölüb, ağır vəziyyətdə olan digər sərnişin xəstəxanaya çatdırılıb. Regional hökumətin məlumatına görə, həkimlər yaralının həyatını xilas etməyə çalışır.
Dəmiryol qurumlarının məlumatına görə, qatardakı sərnişinlər və heyət üzvləri xəsarət almayıb. Uzaq Şərq Dəmir Yolu qatarın relsdən çıxmadığını və toqquşmadan 37 dəqiqə sonra hərəkətini davam etdirdiyini bildirib.
Regional prokurorluq qəzanın başvermə şəraitini araşdırır. Mikroavtobusda olan şəxslərin hansı ölkələrin vətəndaşları olduğu açıqlanmayıb.
