Umarali Raxmonaliyev: “Sabah” Çempionlar Liqası və Premyer Liqada uğur hədəfləyir

“Sabah” UEFA Çempionlar Liqasında və Misli Premyer Liqasında yaxşı nəticələr qazanmaq üçün mübarizə aparacaq. Bakı təmsilçisinin 23 yaşlı yarımmüdafiəçisi Umarali Raxmonaliyev komandanın sıx oyun qrafikinə öyrəşməli olduğunu bildirib.

“Vikinq”lə Norveçdə keçiriləcək səfər oyununun çətin olacağını deyən futbolçu qeyd edib ki, bundan əvvəl komandanı səfərdə “Turan Tovuz”la qarşılaşma gözləyir. Raxmonaliyevin sözlərinə görə, komanda həm avrokuboklarda, həm də çempionatda yaxşı nəticə qazanmaq üçün çalışacaq.

Özbəkistanlı oyunçu Misli Premyer Liqasının IX turunda “Qarabağ”la 0:0 hesablı heç-heçə etdikləri matç barədə də danışıb. O, qarşılaşmanı maraqlı adlandırıb və azarkeşlərin oyundan zövq aldığını söyləyib. “Qələbə qazanmaq üçün çox çalışdıq. Amma elə alındı ki, heç-heçə oldu. Üçüncü zonada şanslarımızı reallaşdıra bilmədik”, – deyə Raxmonaliyev bildirib.

Futbolçu stadionun və ot örtüyünün əla səviyyədə olduğunu, komandanın da oyundan zövq aldığını vurğulayıb. O, cari mövsüm çempionatın daha maraqlı keçəcəyini düşünür: “Hər bir komanda yaxşı mübarizə aparır. Bu, azarkeşlər üçün də yaxşıdır. Sonadək mübarizə davam edəcək. Kim güclüdürsə, o da çempion olacaq”.