OMM Redaksiyası
Misli Premyer Liqasında IX turun son iki oyunu oktyabrın 25-də keçiriləcək. Günün ilk qarşılaşmasında “İmişli” Yevlax şəhər stadionunda “Şamaxı” ilə üz-üzə gələcək. Matç saat 15:00-da başlayacaq.
“Şamaxı” 13 xalla turnir cədvəlinin 7-ci pilləsindədir. 7 xalı olan “İmişli” 9-cu yerdə qərarlaşıb. Görüşün baş hakimi Rauf Cabarov olacaq. Ona Zeynal Zeynalov, Kərim Zeynalov və Ruslan Quliyev kömək edəcəklər. VAR-da Əliyar Ağayev, AVAR-da Akif Əmirəli çalışacaq. Hakim-inspektor Anar Salmanov, AFFA nümayəndəsi isə Rüfət Əmirovdur.
Günün son matçında “Sabah” “Dalğa Arena”da “Qarabağ”ı qəbul edəcək. Qarşılaşma saat 18:00-da başlayacaq. “Sabah” 19 xalla turnir cədvəlinə başçılıq edir, 17 xalı olan “Qarabağ” isə üçüncü pillədədir.
Bu oyunu Rəşad Əhmədov idarə edəcək. Köməkçi hakimlər Elşad Abdullayev, Pərvin Talıbov və Emin Əliyev olacaq. VAR-da Kamranbəy Rəhimov, AVAR-da Teymur Teymurov işləyəcək. Hakim-inspektor Rəhim Həsənov, AFFA nümayəndəsi Erkin Hüseynov təyin olunub.
Turun əvvəlki oyunlarında “Qəbələ” “Araz-Naxçıvan”ı 2:1, “Zirə” “Sumqayıt”ı 3:2, “Kəpəz” isə “Şəfa”nı 2:1 hesabı ilə məğlub edib. “Neftçi” – “Turan Tovuz” matçı 1:1 hesabı ilə başa çatıb.
