OMM Redaksiyası
“Sabah” Azərbaycan çempionatları tarixində qeydə alınmış rekordu təkrarlayıb. Misli Premyer Liqasının geridə qalan hissəsində paytaxt təmsilçisi keçirdiyi 8 oyunda cəmi 1 qol buraxıb.
Komandanın hər oyuna buraxdığı qolların orta göstəricisi 0,125-dir. Peşəkar Futbol Liqasının məlumatına görə, 1992-ci ildən keçirilən ölkə çempionatında ilk 8 matçda yalnız 1 qol buraxmaq ümumilikdə beşinci dəfə baş verib.
Son 10 mövsümdə bu nəticəyə ilk dəfə nail olunub. Çempionatın ilk 8 oyununda cəmi 1 qol buraxan son komanda 2016/2017 mövsümündə “Qəbələ” olub.
Rekord ilk dəfə 2001/2002 mövsümündə “Neftçi” tərəfindən qeydə alınıb. Altı il sonra AZAL, daha 9 il sonra isə “Xəzər Lənkəran” həmin göstəricini təkrarlayıb. “Sabah”ın nəticəsi bu komandaların göstəricisinə bərabər olub.
