OMM Redaksiyası
Misli Premyer Liqasının IX turunda “Zirə”nin baş məşqçisi Rəşad Sadıqov üçün əlamətdar olub. Peşəkar Futbol Liqasının mətbuat xidmətinin məlumatına görə, qəsəbə klubu Sadıqovun rəhbərliyi altında 250-ci matçına çıxıb.
“Zirə” yubiley oyununda doğma meydanda “Sumqayıt”ı qəbul edib və 3:2 hesablı qələbə qazanıb. Sadıqov 2020-ci ilin iyulundan komandaya rəhbərlik edir.
Onun rəhbərliyi dövründə “Zirə” 112 qələbə qazanıb, 76 heç-heçə edib və 62 dəfə məğlub olub. Bu oyunlarda komandanın vurduğu və buraxdığı qolların fərqi 316-237-dir.
Keçirilən 250 matçın 206-sı Premyer Liqada, 28-i Azərbaycan Kubokunda, 16-sı isə avrokuboklarda olub. Sadıqovun “Zirə”də debütü 2020-ci il avqustun 23-də baş tutub. Həmin gün komanda Premyer Liqanın səfər matçında “Qəbələ” ilə 1:1 hesablı heç-heçə edib.
