OMM Redaksiyası
“Zirə”nin futbolçusu Dimitri Leqbo Misli Premyer Liqasının IX turunda “Sumqayıt”a 3:2 hesabı ilə qalib gəldikləri oyundan sonra sport24.az-a müsahibə verib.
Leqbo görüşün çətin keçdiyini, “Sumqayıt”ın yaxşı çıxış etdiyini bildirib. Onun sözlərinə görə, komanda 2:0 öndə olduğu halda rəqib psixoloji üstünlüyü ələ keçirib. “Bir sayılmayan qolları da oldu. Hakimlər ofsayt qərarı verdilər. Buna baxmayaraq, 2:2-dən sonra oyundan qopmadıq. Bu səhvləri təkrarlamamağa çalışacağıq”, – futbolçu deyib.
O, “Sumqayıt”la qarşılaşmanın çətin olacağını əvvəlcədən bildiklərini, rəqibin yaxşı futbolçulardan təşkil olunduğunu və son oyunlarda inamlı qələbələr qazandığını söyləyib.
Leqbo Azərbaycan çempionatının səviyyəsini yüksək qiymətləndirib. O, ölkəyə gəlməzdən əvvəl uzun müddət oynamadığı üçün çətinlik çəkdiyini, hazırda isə özünü yaxşı hiss etdiyini və hər oyunda daha inamlı olacağını qeyd edib.
Mövqe seçimi və transfer qərarı
Futbolçu uşaq vaxtı sol cinah müdafiəçisi, daha sonra isə sağ və sol vinger kimi oynadığını bildirib. “Zirə”də bir neçə mövqedə çıxış edən Leqbo üçün əsas məqsəd komandaya fayda verməkdir: “Baş məşqçi harada desə, orada oynamağa hazıram”.
O, kluba gəlməzdən əvvəl idman direktoru ilə danışdığını və onun ideyalarının qərarına təsir etdiyini söyləyib. Həmyerlisi Bayere Lue, “Sumqayıt”ın futbolçusu Sedrik Badolo və tanıdığı digər oyunçular da ona komanda və ölkə barədə müsbət fikirlər çatdırıblar.
