OMM Redaksiyası
“Sumqayıt”ın futbolçusu Nihad Əhmədzadə Misli Premyer Liqasının səkkizinci turunda “Araz-Naxçıvan” üzərində 2:1 hesablı qələbəni dəyərləndirib. Ev sahibi komanda ilk qolu buraxsa da, ikinci hissədə hesabı dəyişərək qalib gəlib.
“İlk qolu rəqib vurdu. Vəziyyət çətinləşsə də, ruhdan düşmədik və ikinci hissədə geridönüş edərək əzmkar qələbə qazandıq”, – deyə 20 yaşlı yarımmüdafiəçi bildirib. Onun sözlərinə görə, fasilədə baş məşqçi Filipe Kandido paltardəyişmə otağında komanda ilə danışıb və bundan sonra futbolçular daha yaxşı çıxış ediblər.
Əhmədzadə 81-ci dəqiqədə vurduğu qələbə qolunu azarkeşlərlə qeyd etmək istədiyini deyib: “Qol vurduğum üçün çox sevincli idim və bunu azarkeşlərlə birlikdə qeyd etmək istədim. Komandama xeyir vermişəmsə, çox xoşbəxtəm. Mənə şans verdiyi üçün baş məşqçimizə təşəkkürümü bildirirəm”. O, bu fikirləri sportify.az-a açıqlamasında söyləyib.
Futbolçu “Sumqayıt”ın daha əvvəl “Qəbələ”ni 4:1 hesabı ilə məğlub etdiyini xatırladıb və ardıcıl iki qələbədən sonra komandanın toparlandığını vurğulayıb: “Daha yaxşı olacağıq. Kollektiv olaraq buna inanırıq”.
Əhmədzadə Azərbaycan U-21 millisində olduğu vaxt “Sumqayıt”ın əvəzedici heyətinə göndərildiyini öyrənib. Bir neçə günlük məşqdən sonra əsas komandaya qaytarılıb. “Millidə əvəzedici heyətə göndərildiyimi öyrəndim. Klubuma qayıtdıqdan sonra da bunu mənə bir daha bildirdilər. Qalan məsələlər barədə çox da məlumat vermək istəmirəm”, – deyə o, özü ilə bağlı digər detalları açıqlamaq istəmədiyini bildirib.
