OMM Redaksiyası
Misli Premyer Liqasının IX turunda “Zirə”nin qonağı olacaq “Sumqayıt” qarşılaşmaya üç futbolçusuz çıxacaq. Klubun mətbuat katibi Zaur Xudiyev bildirib ki, yarımmüdafiəçi Səbuhi Abdullazadə, hücumçular Rüstəm Əhmədzadə və Jeam Oliveyra oyunda iştirak edə bilməyəcəklər.
Xudiyevin sözlərinə görə, “Sumqayıt”ın cəzalı futbolçusu yoxdur. Misli Premyer Liqasının VII turunda “Qəbələ” ilə matçda zədələnən Rüstəm Əhmədzadə iki, Jeam Oliveyra isə altı-səkkiz həftə kollektivdən ayrı qalacaq.
Səbuhi Abdullazadənin təxminən beş ay yaşıl meydanlardan kənarda qalacağı gözlənilir. O, Misli Premyer Liqasının I turunda “Neftçi” ilə görüşün 74-cü dəqiqəsində qırmızı vərəqə alaraq meydandan qovulub. Daha sonra dəhlizdə əli ilə şüşəni sındıran futbolçunun ayağına böyük şüşə parçası düşüb və o, ciddi zədə alıb.
“Zirə” – “Sumqayıt” qarşılaşması oktyabrın 23-də Zirə İdman Kompleksinin stadionunda keçiriləcək. Görüş saat 19:00-da başlayacaq. Hazırda “Zirə” 12 xalla turnir cədvəlinin altıncı, səkkiz xalı olan “Sumqayıt” isə səkkizinci pilləsində qərarlaşıb.
