Avstraliyada jurnalist selə düşən avtomobildəki şəxsi xilas edib

Avstraliyanın Kvinslend ştatında jurnalist və yoldan keçən şəxs suya qərq olan avtomobildəki kişini xilas ediblər. Onlar sürücünü avtomobil suyun altında tamamilə itmədən bir qədər əvvəl təhlükəsiz yerə çıxarıblar.

AnewZ-in məlumatına görə, Avstraliyanın ictimai yayımçısı “ABC”nin jurnalisti Uill Mürrey cümə axşamı Brisbenin şimalında daşqınlar barədə reportaj hazırlayarkən bir kişi dördtəkərli avtomobili sel sularından keçirməyə çalışıb. “ABC”nin məlumatına əsasən, avtomobilin mühərriki dayanıb və maşın suya batmağa başlayıb.

Sürücünün təhlükədə olduğunu görən Mürrey və başqa bir kişi avtomobilə doğru üzərək onu xilas ediblər.

Xilasetmə əməliyyatını görən “ABC”nin operatoru Liz Pikering müdaxilənin faciənin qarşısını aldığını deyib: “Onlar, şübhəsiz ki, həmin kişinin həyatını xilas etdilər. Buna heç bir şübhə yoxdur”.

Hadisə baş verən zaman Morayfild şəhərinə təxminən 170 millimetr yağış yağıb. Güclü yağış Brisbenin şimalındakı ərazilərdə daşqınlara və yerli yollarda təhlükəli vəziyyətə səbəb olub.