Vensdən İran açıqlaması: “Bu, müharibə deyil”

ABŞ-nin vitse-prezidenti Cey Di Vens İranla bağlı mövcud qarşıdurmanı müharibə hesab etmədiyini bildirib.

“Operativ Məlumat Mərkəzi-OMM” xəbər verir ki, bu barədə “Reuters” məlumat yayıb.

Məlumata görə, Vens Yaxın Şərqdəki vəziyyəti şərh edərkən hazırda aktiv hərbi əməliyyatların aparılmadığını, lakin bəzi bölgələrdə vəziyyətin kəskinləşdiyini qeyd edib.

Vitse-prezident münaqişənin başa çatacağı tarixlə bağlı konkret vaxt açıqlamayıb. O, bunun İranın bundan sonra atacağı addımlardan asılı olduğunu vurğulayıb.

Vens həmçinin bildirib ki, İran ticarət gəmilərinə zərbələr endirməyə davam etdiyi müddətdə regionda sülh danışıqlarının aparılması mümkün deyil.

Xatırladaq ki, daha əvvəl ABŞ Prezidenti Donald Trampın İranla bağlı strategiyanı köməkçiləri ilə müzakirə etdiyi bildirilmişdi. Məlumata görə, Tramp iqtisadi təzyiqlərin İranın nüvə proqramından imtina etməsinə və ya ölkədəki rejimin süqutuna gətirib çıxara biləcəyini düşünür.