OMM Redaksiyası
“Barselona”nın 19 yaşlı vingeri Lamin Yamalın atası Munir Nasraui Barselona hava limanında baş verən insidentlə gündəmə gəlib. İspaniyanın “El Español” nəşrinin məlumatına görə, Nasraui kafeteriya zonasında dava salıb.
Nəşrin yazdığına görə, Nasraui gödəkçəsini icazə verilməyən yerdə qoyub. Kafeteriya əməkdaşının iradından sonra aralarında mübahisə yaranıb. Mübahisə zamanı futbolçunun atası qadının üzünə tüpürüb.
Hava limanında olan şəxslərdən biri əməkdaşı müdafiə etməyə çalışıb. Nasraui ona da hücum edib, stul götürərək kişiyə atmağa cəhd göstərib.
Bu, son günlər Nasraui ilə bağlı ikinci qalmaqaldır. Bundan əvvəl o, Londonda “London Palladium” teatrının yaxınlığında küçə davasına qarışıb. Hadisə “Qızıl top”un təqdimetmə mərasiminin qala gecəsi başa çatdıqdan sonra, Rusiya millisinin keçmiş kapitanı Andrey Arşavinin gözü qarşısında baş verib. Nasraui Rusiya nümayəndə heyətinin operatorunun telefonunu az qala sındırıb.
