OMM Redaksiyası
Azərbaycan gimnastları Çinin Nankin şəhərində keçirilən batut gimnastikası və tamblinq üzrə Dünya Yaş Qrupları Yarışlarında daha bir medal qazanıblar. 13-14 yaşlı oğlanlar arasında sinxron batut proqramında çıxış edən Ömər Qasımlı və Muhamməd Həsənli bürünc medal əldə ediblər.
Azərbaycan cütlüyü final mərhələsində 46,160 xal toplayaraq üçüncü yeri tutub. Gimnastlar təsnifat mərhələsində 44,050 xalla səkkizinci olub və finala vəsiqə qazanıblar. Həlledici mərhələdə nəticələrini 2,110 xal yaxşılaşdırıblar.
Digər nəticələr
Mehdi Əliyev və Nicat Mirzəyev 17-21 yaş kateqoriyasının sinxron proqramında 48,960 xalla dördüncü yeri tutaraq finala yüksəliblər.
Tamblinq üzrə 11-13 yaşlı qızların fərdi yarışında Əsnad Niftiyeva 42,700 xalla səkkizinci nəticəni göstərib və finalda iştirak hüququ qazanıb.
Dünya Yaş Qrupları Yarışları noyabrın 15-də başa çatacaq.
