Deklan Rays İspaniya ilə oyunda irqçilik gözləmədiyini deyib

İngiltərə millisinin yarımmüdafiəçisi Deklan Rays İspaniya ilə oyunda irqçilik təzahürləri gözləmədiyini bildirib. Millətlər Liqasının qarşılaşması noyabrın 15-də Madriddəki “Metropolitano” stadionunda keçiriləcək.

İngiltərə yığması İspaniyanın paytaxtında 2004-cü ildən bəri ilk dəfə oynayacaq. Həmin vaxt “Santyaqo Bernabeu” stadionunda keçirilən görüşdə (0:1) tribunlardan qonaq komandanın futbolçularına qarşı irqçi ifadələr səsləndirilmişdi.

İngiltərə millisinin baş məşqçisi Tomas Tuxel matçdan əvvəl komandaya UEFA-nın irqçilik əleyhinə protokolları barədə məlumat vermək niyyətində olduğunu açıqlayıb.

Rays daha əvvəl Monteneqro və Bolqarıstanda irqçiliklə üzləşdiyini, həmin vaxt xüsusi protokola uyğun olaraq komandanın meydanı tərk etdiyini söyləyib. O, bu məsələdə komandanın mövqeyinin aydın olduğunu və necə davranacaqlarını bildiklərini vurğulayıb.

Futbolçu baş məşqçinin mövzunu hələ komanda ilə müzakirə etmədiyini, lakin bunu edə biləcəyini deyib. Rays Madridi gözəl şəhər, stadionu isə əla adlandırıb və rəqib futbolçulara böyük hörmət bəslədiklərini qeyd edib. Onun sözlərini “Sky Sports” yayıb.