Çin Xalq Respublikası Afrikada, xüsusilə Konqo Demokratik Respublikası və Uqandada yayılan ebola epidemiyası ilə bağlı vəziyyəti yaxından izləyir.
“Operativ Məlumat Mərkəzi-OMM” xəbər verir ki, bu barədə Çin Xarici İşlər Nazirliyinin sözçüsü Quo Ciakun brifinq zamanı açıqlama verib.
O bildirib ki, Pekin regiondakı epidemioloji vəziyyətə xüsusi diqqət yetirir və Afrikada yaşayan Çin vətəndaşları üçün ehtiyat tədbirlərinin gücləndirilməsini tövsiyə edir.
Diplomatın sözlərinə görə, indiyədək bölgədə olan Çin vətəndaşları arasında yoluxma halları qeydə alınmayıb.
Məlumata əsasən, Konqo Demokratik Respublikasının səhiyyə qurumları 5 may tarixində İturi əyalətində yeni ebola ocağı barədə ilkin siqnallar alıb. Daha sonra xəstəliyin törədicisi kimi Ebola-Bundibugyo virusu müəyyən edilib və Konqo ilə yanaşı Uqandada da epidemiya elan olunub.
Ümumdünya Səhiyyə Təşkilatı isə 17 may tarixində bu vəziyyəti qlobal səhiyyə fövqəladə vəziyyəti kimi qiymətləndirib.
