Ermənistanın Baş naziri Nikol Paşinyan Ermənistan ərazisində saxlanılan Azərbaycan hərbçisi Nəsimi Musayev barədə yeni açıqlama verib.

"Operativ Məlumat Mərkəzi-OMM" Ermənistan mediasına istinadən xəbərinə görə, Paşinyan bildirib ki, üzərində odlu silah olan azərbaycanlı hərbçi saxlanılarkən Ermənistan tərəfinə müqavimət göstərməyib.

Onun sözlərinə görə, hərbçinin müəyyən xəsarətləri də olub.

“Əlində odlu silah olan azərbaycanlı hərbçi saxlanılarkən ümumiyyətlə müqavimət göstərməyib. Bildiyim qədər, onun müəyyən xəsarətləri də olub”, - deyə Paşinyan bildirib.

Ermənistan müdafiə naziri: Azərbaycandan saxlanılan hərbçi diversant deyil

Ermənistanın müdafiə naziri Suren Papikyan isə Ermənistan tərəfinin saxladığı azərbaycanlı hərbçinin diversant olmadığını bildirib.

Papikyan bu barədə oktyabrın 7-də Ermənistan parlamentində hökumət saatı zamanı danışıb.

Nazirin sözlərinə görə, azərbaycanlı hərbçi saxlanılarkən Ermənistan tərəfinə müqavimət göstərməyib.

“Bu, artıq onun diversant olmadığının göstəricisidir”, - deyə Papikyan bildirib.

Ermənistan müdafiə naziri həmçinin qeyd edib ki, insident barədə məlumat daxil olduqdan sonra aidiyyəti qurumlar tərəfindən müvafiq tədbirlər görülüb. Onun sözlərinə görə, axtarış işləri də aparılıb.