Afət Ziyadqızı
İran İslam İnqilabı Keşikçiləri Korpusunun (SEPAH) komandanının müşaviri Məhəmməd Rza Nəqdi Tehranın strateji əhəmiyyətli Hörmüz boğazındakı qanunsuz gəmiçilik marşrutlarını tamamilə bağlamaq niyyətində olduğunu bəyan edib.
"Operativ Məlumat Mərkəzi-OMM" xəbər verir ki, Nəqdi İranın dövlət teleradio şirkətinə açıqlamasında “Hörmüz boğazı bağlıdır və biz qanunsuz marşrutların fəaliyyətinə son qoyacağıq” ifadələrini işlədib.
O, Tehranın irəli sürdüyü siyasi və hərbi tələblər icra olunana qədər boğazın bağlı qalacağını vurğulayıb. Eyni zamanda, SEPAH nümayəndəsi Hüseyn Möhibi Tehranın boğazdan kiçik həcmli gəmilərin keçişinə də mane olduğunu diqqətə çatdırıb.
Buna qarşı olaraq, ABŞ dövlət katibi Marko Rubio bir qədər əvvəl Hörmüz boğazından neft daşımalarının həcminin Vaşinqton və Tehran arasında münaqişə başlamazdan əvvəlki göstəricilərə yaxınlaşdığını iddia etmişdi.
Xatırladaq ki, ABŞ və İsrailin fevralın 28-də İrandakı strateji obyektlərə endirdiyi zərbələrdən sonra tərəflər arasında hərbi qarşıdurma kəskinləşib. İyun ayında döyüşlərin dayandırılmasına dair memorandum imzalansa da, qarşılıqlı zərbələr yenidən bərpa olunub. Qlobal neft, neft məhsulları və mayeləşdirilmiş təbii qaz (LNG) daşınmasının əsas arteriyası sayılan Hörmüz boğazında naviqasiyanın iflic olması dünya bazarlarında enerjidaşıyıcılarının kəskin bahalaşmasına səbəb olub.
