İran və Oman Hörmüz boğazından gələn gəlirləri bölüşəcək

İran və Oman arasında Hörmüz boğazının sularının istifadəsi və bu su yolundan əldə olunan gəlirlərin bölüşdürülməsi ilə bağlı razılaşma əldə edildiyi bildirilib.

“Operativ Məlumat Mərkəzi – OMM” xəbər verir ki, İranın yarı-rəsmi “Tasnim” agentliyinin məlumatına görə, bu barədə İran İslam İnqilabı Keşikçiləri Korpusu (SEPAH) açıqlama yayıb.

Məlumata əsasən, tərəflər danışıqlar nəticəsində Hörmüz boğazının İran və Oman arasında bölgüsü, eləcə də boğazdan keçən gəmilərdən əldə olunan rüsum və digər gəlirlərin paylaşdırılması məsələsində razılığa gəliblər.

Razılaşmanın detalları və gəlirlərin hansı nisbətdə bölüşdürüləcəyi barədə isə əlavə məlumat verilməyib.

Qeyd edək ki, Hörmüz boğazı qlobal enerji daşımalarının ən mühüm marşrutlarından biri hesab olunur. Bu səbəbdən İran və Oman arasında əldə edildiyi açıqlanan razılaşmanın regionun iqtisadi və logistika balansı baxımından strateji əhəmiyyət daşıdığı bildirilir.