OMM Redaksiyası
“Beşiktaş”ın mətbuat xidməti Türkiyə Super Liqasının rəsmi yayımçısını və Türkiyə Futbol Federasiyasını (TFF) ikili standartda ittiham edib. Klubun bəyanatı “Qalatasaray”la “Fənərbaxça” arasında oktyabrın 26-da keçirilən və 2:1 hesabı ilə başa çatan derbidən sonra yayımlanıb.
“Beşiktaş” bildirib ki, bir neçə həftə əvvəl futbolçusu Duşan Vlahoviçin ani hərəkəti yayımçı tərəfindən müxtəlif rakurslardan dəfələrlə göstərilib. Klubun sözlərinə görə, həmin görüntülər TFF-nin hüquqşünasları üçün ittiham dosyesi formalaşdırıb və nəticədə futbolçu diskvalifikasiya olunub.
Klub derbidən sonra meydanda onlarla futbolçunun iştirak etdiyi kütləvi dava zamanı yayımçının ümumi planlara keçdiyini və hadisələri canlı yayımda gizlətməyə çalışdığını iddia edib. “Bu, Türkiyə idman tarixinə ikili standartların nümunəsi kimi düşəcək. Söhbət “Beşiktaş”dan gedəndə niyə yaxın planlardan istifadə olunur, digər klubların iştirakı ilə baş verən kütləvi qarşıdurmalar isə ümumi planlarla ört-basdır edilir?” – bəyanatda qeyd olunub.
“Qalatasaray” derbidə Viktor Osimhenin 29-cu və 44-cü dəqiqələrdə vurduğu qollarla 2:0 hesablı üstünlük qazanıb. İrfan Can Kahveci 62-ci dəqiqədə “Fənərbaxça”nın yeganə qolunu vurub.
