OMM Redaksiyası
Azərbaycanda daxili yanma mühərriki ilə işləyən avtomobillərin mərhələli şəkildə alternativ enerji ilə çalışan nəqliyyat vasitələri ilə əvəzlənməsi planlaşdırılır. Bu istiqamətdə təsdiqlənən strategiyada 2035-ci ilədək ilkin addımların atılması, 2060-cı ilədək isə minik avtomobillərində elektrik və digər alternativ enerji mənbələrinin payının 100 faizə çatdırılması hədəflənir.
"Operativ Məlumat Mərkəzi-OMM" “AzTV”-yə istinadən xəbər verir ki, nəzərdə tutulan dəyişikliklər avtomobil bazarına, sürücülərin seçim imkanlarına və enerji doldurma infrastrukturuna təsir edə bilər.
Bəs sürücülər bu təşəbbüsə necə yanaşırlar?
Sürücülərin bir qismi benzinlə işləyən avtomobillərə daha çox güvəndiyini və seçim imkanlarının qorunmasının vacibliyini bildirir. Digərləri elektrik avtomobillərinin ətraf mühit baxımından üstünlüklərini qeyd etsələr də, ənənəvi yanacaqla işləyən nəqliyyat vasitələrindən istifadənin hələ də geniş yayıldığını vurğulayırlar. Bəzi vətəndaşlar isə elektrik avtomobillərinin insan sağlamlığına mümkün təsirləri ilə bağlı narahatlıqlarını ifadə edirlər. Bununla belə, elektrik avtomobillərindən radiasiya təhlükəsi yarandığı barədə səsləndirilən fikirlər elmi sübut kimi qəbul edilməməlidir.
Mövzu ilə bağlı danışan ekspert bildirib ki, strategiyanın təsdiqlənməsi daxili yanma mühərrikli avtomobillərin sabahdan etibarən istifadəsinə məhdudiyyət qoyulacağı demək deyil. Sənəd uzunmüddətli hədəfləri əhatə edir və ilkin mərhələdə, xüsusilə sərnişindaşımada istifadə olunan nəqliyyat vasitələrinin daha ekoloji təmiz alternativlərlə əvəzlənməsini nəzərdə tutur.
Strategiyada elektrik avtomobillərinin istifadəsinin artırılması üçün təşviq proqramlarının tətbiqi də planlaşdırılır.
Beləliklə, qarşıya qoyulan hədəflər benzin və dizellə işləyən bütün avtomobillərin dərhal qadağan olunmasını deyil, nəqliyyat sektorunda uzunmüddətli keçidi nəzərdə tutur. Konkret məhdudiyyətlərin tətbiqi ilə bağlı qərarlar isə müvafiq hüquqi sənədlər və dövlətin həyata keçirəcəyi tədbirlər əsasında müəyyənləşəcək.
