OMM Redaksiyası
Tibetin şimalındakı Naqçu şəhərində 7 bal gücündə zəlzələ baş verib. Yerli hakimiyyət orqanlarının məlumatına görə, 16 nəfər ölüb, 65 nəfər yaralanıb. AnewZ-nin məlumatına görə, bu, 2024-cü ilin yanvarından bəri Çində qeydə alınan ən güclü zəlzələdir.
Naqçu polis idarəsinin bildirdiyinə görə, xilasetmə və təcili yardım işlərinə kömək üçün zəlzələnin episentrinə yol polisi və sahə polis əməkdaşları da daxil olmaqla 300-dən çox polis göndərilib. Polis əməkdaşları zədələnmiş evlərə baxış keçirib və sakinlərin təhlükəsiz ərazilərə köçürülməsinə yardım ediblər.
Çinin dövlət xəbər agentliyi Sinxuanın məlumatına görə, 12 mindən çox insan təhlükəsiz ərazilərə köçürülüb. Yerli medianın yaydığı görüntülərdə sakinlərin evlərini tərk edərək açıq havada və ya küçələrdə park edilmiş avtomobillərdə sığınacaq tapdığı görünür. Sakinlərdən biri güclü təkanların onu yuxudan oyatdığını və zəlzələ zamanı evinin cırıldadığını deyib.
Çin Zəlzələ Şəbəkələri Mərkəzi zəlzələdən sonra 413 afterşok qeydə alındığını açıqlayıb.
Çin Prezidenti Si Cinpin xilasetmə işlərinin hərtərəfli aparılması və ölənlərin sayını minimuma endirmək üçün yaralılara vaxtında tibbi yardım göstərilməsi barədə göstəriş verib.
Si Cinpin seysmik və meteoroloji şəraitin yaxından izlənməsinin, ikinci dərəcəli fəlakətlərin qarşısını almaq üçün xilasetmə işlərinin elmi əsaslarla aparılmasının vacibliyini vurğulayıb. O, yardım ləvazimatlarının ayrılmasına, zərərçəkənlərin lazımi qaydada yerləşdirilməsinə və zədələnmiş infrastruktura operativ müdaxiləyə çağırıb.
2010-cu ildə qonşu Çinxay əyalətinin Yuşu şəhərində 7,1 bal gücündə zəlzələ baş vermiş, azı 2 698 nəfər həlak olmuş, təxminən 300 nəfər itkin düşmüşdü.
