OMM Redaksiyası
Ukrayna mətbuatında dərc olunan təhlildə “Qarabağ”ın futbolçusu Aleksey Kaşukun cari mövsümdə artan roluna diqqət çəkilib. 26 yaşlı yarımmüdafiəçinin milli komandaya namizəd kimi nəzərdən keçirilməyə layiq olduğu bildirilib.
Kaşuk bu mövsüm keçirdiyi 15 oyunda beş qol vurub və bir məhsuldar ötürmə edib. Təhlildə onun inkişafının statistik göstəricilərlə yanaşı, komandadakı mövqeyinin dəyişməsi əsasında da qiymətləndirilməli olduğu qeyd olunub.
“Qarabağ”dakı rolu artıb
Yazıda Kaşukun əsas heyətdə möhkəmlənməsi Leandro Andradenin “Polissya”ya transferi ilə əlaqələndirilib. “Qarabağ”ın sağ cinahında uzun müddət əsas seçim olan kabo-verdeli futbolçunun ayrılmasının ukraynalı yarımmüdafiəçiyə yeni imkanlar yaratdığı bildirilib. Kaşukun bu fürsətdən yararlanaraq hücum xəttinin əsas fiqurlarından birinə çevrildiyi vurğulanıb.
Ötən mövsüm çempionluğu “Sabah”a uduzan “Qarabağ”ın yenilənmə mərhələsindən keçdiyi və hücum xəttinə yeni oyunçular cəlb etdiyi də qeyd olunub. Kaşukun komandaya və oyun sisteminə daha yaxşı bələd olması, eləcə də müxtəlif hücum mövqelərində çıxış etməsi üstünlük sayılıb.
Kaşuk “Qarabağ”da 87 oyunda 17 qol və 13 məhsuldar ötürmə edib. O, əvvəllər “Sabah”da 41 matçda 18 qol və 12 assistlə yadda qalıb. Bu mövsüm “Şamaxı”, “Zirə”, “İmişli” və “Neftçi” ilə oyunlarda fərqlənib, Kiyev “Dinamo”su və “Benfika” ilə qarşılaşmalardakı çıxışı da təhlildə yüksək qiymətləndirilib.
Ukrayna millisinə mümkün dəvət
Müəllif Ukrayna yığmasının sağ cinahında alternativlərin məhdudluğunu Kaşuka şans verilməsi üçün əsas kimi göstərib. Viktor Tsıqankov mövqenin əsas namizədlərindən biri olsa da, ona əvəzedici futbolçunun lazım olduğu bildirilib.
Təhlildə Azərbaycanın UEFA ölkələr reytinqində 24-cü, Ukraynanın isə 23-cü yerdə qərarlaşması da qeyd olunub. Müəllif Kaşukun mütləq əsas heyətdə oynamasının vacib olmadığını, lakin milli komandanın məşqçilər korpusunun onu diqqətlə izləməli olduğunu vurğulayıb.
