OMM Redaksiyası
Ermənistanın “Sportaran” idman nəşri yunan-Roma güləşi üzrə Azərbaycan millisinin üzvü Sənan Süleymanovu (77 kq) Malxas Amoyanın dünya çempionatındakı əsas rəqiblərindən biri hesab edib. Yarış oktyabrın 24-də Astanada start götürəcək.
Nəşr yazıb ki, Süleymanov 2023-cü il dünya çempionatının gümüş medalçısıdır, Paris Olimpiadasında isə beşinci yeri tutub. Məqalədə onun Amoyanla şəxsi görüşlərdə üstünlüyə malik olduğu da vurğulanıb: Azərbaycanlı güləşçi iki dəfə qalib gəlib, Ermənistan təmsilçisi isə bir qələbə qazanıb.
“Sportaran”ın müəllifləri Süleymanovun 77 kq çəki dərəcəsində böyük təcrübəyə malik olduğunu, Amoyanın güləş üslubunu yaxşı tanıdığını və dünya çempionatında yenidən medal uğrunda mübarizə apara biləcəyini qeyd ediblər. Azərbaycanlı idmançı Astanadakı yarışda beşinci nömrə altında səpələnib.
Güləşçilərin əvvəlki görüşləri
Dünya Güləş Birliyinin (UWW) məlumat bazasında Süleymanovla Amoyan arasında üç qarşılaşma qeydə alınıb. Onlar ilk dəfə 2016-cı ildə Buxarestdə keçirilən yeniyetmələr arasında Avropa çempionatında qarşılaşıblar. 1/8 finalda Süleymanov 9:6 hesabı ilə qalib gəlib.
2022-ci il aprelin 1-də Budapeştdə keçirilən böyüklər arasında Avropa çempionatının 1/4 finalında Amoyan 6:5 hesabı ilə revanş alıb.
Güləşçilərin son görüşü 2023-cü il sentyabrın 21-də Belqradda keçirilən dünya çempionatının yarımfinalında baş tutub. Süleymanov 5:0 hesabı ilə qalib gələrək finala yüksəlib və Paris-2024 Yay Olimpiya Oyunlarına lisenziya qazanıb.
