OMM Redaksiyası
ABŞ-ın Azərbaycandakı müvəqqəti işlər vəkili Emi Karlon Bakıda keçirilən sumo üzrə dünya çempionatını ziyarət edərək hər iki ölkənin idmançılarına dəstək verib. Bu barədə ABŞ-ın Azərbaycandakı səfirliyinin sosial şəbəkə hesabında paylaşım edilib.
Diplomatik nümayəndəlik ABŞ millisinin üç medal qazanmasını qeyd edib. Kelliann Boll gümüş, Etan Peres bürünc medal əldə edib, ABŞ-ın qadınlardan ibarət komandası isə üçüncü yeri tutub. Daha dörd amerikalı idmançı medal uğrunda mübarizə mərhələsinə yüksəlib.
Şəfiyevin tarixi qızıl medalı
Səfirlik Azərbaycan təmsilçisi Əmrah Şəfiyevin nailiyyətinə xüsusi diqqət ayırıb. O, ölkəyə sumo üzrə dünya çempionatlarında ilk qızıl medalı qazandırıb.
“Azərbaycanlı sumoçu Əmrah Şəfiyevin ölkəsi üçün tarixdə ilk qızıl medalı qazanmasının şahidi olmaq bizim üçün böyük sevinc idi. Təbrik edirik!”
Diplomatik nümayəndəlik beynəlxalq yarışın Bakıda təşkilinə görə də təşəkkürünü bildirib və bütün idmançıları çıxışlarına, əzmkarlıqlarına və idman ruhuna görə alqışlayıb.
“Belə möhtəşəm beynəlxalq idman tədbirinin keçirilməsinə görə təşkilatçılara təşəkkür edirik. Bütün idmançıları təsirli çıxışlarına, əzmkarlıqlarına və idman ruhuna görə alqışlayırıq”.
