OMM Redaksiyası
Türkiyə “Facebook” və “Instagram”ın sahibi olan “Meta”ya qarşı uşaqların yaşına uyğun olmayan məzmuna görə məhkəmə iddiası qaldırmağa hazırlaşır. AnewZ-nin məlumatına görə, bunu təhsil naziri Yusuf Tekin oktyabrın 22-də Ankarada deyib.
Jurnalist ailələrin “Meta”ya qarşı iddia qaldırdığını xatırladanda Tekin “Bəli, biz də hazırda buna hazırlaşırıq. Məhkəməyə müraciət etməyi nəzərdən keçiririk”, — deyə cavab verib.
Tekin bildirib ki, uşaqlar sosial şəbəkələrdə “yaşlarına görə pedaqoji baxımdan uyğun olmayan” məzmuna məruz qalır və bu, onların təhsilinə, eləcə də şəxsi inkişafına mənfi təsir göstərir.
Nazirin sözlərinə görə, hüquqi tədbirlərin mümkün variantlarını Türkiyənin Ticarət Nazirliyi və Sənaye Nazirliyi araşdırır. Tekin “Meta”nın ya yaşa uyğun olmayan məzmunu uşaqlar üçün əlçatmaz etməli, ya da onu dəyişdirməli olduğunu bildirib.
Türkiyədə 2025-ci ilin sentyabrından məktəblərdə mobil telefonlara ölkə üzrə qadağa tətbiq edilib. Şagirdlər telefonlarını təhvil verməli, müəllimlərdən isə dərs otaqlarına telefon gətirməmələri gözlənilir.
Avropa Komissiyası aprel ayında “Meta”nın 13 yaşdan kiçik uşaqların “Facebook” və “Instagram”dan istifadəsinin qarşısını ala bilmədiyinə görə Avropa İttifaqı qanunlarını pozduğunu müəyyən edib. “Meta” iki il davam edən araşdırmanın nəticələri ilə razılaşmadığını və müvafiq tədbirlərin görüldüyünü bildirib.
