Afət Ziyadqızı
Böyük Britaniya hökuməti ölkə əhalisinin təbii fəlakətlərə, mürəkkəb kiberhücumlara və kritik infrastruktur obyektlərində yarana biləcək texnogen fasilələrə qarşı davamlılığını artırmaq məqsədilə “Be Ready” (“Hazırlıqlı ol”) adlı genişmiqyaslı milli maarifləndirmə kampaniyasına start verib.
"Operativ Məlumat Mərkəzi-OMM" xəbər verir ki, "Haber Global" telekanalının yaydığı məlumata əsasən, Birləşmiş Krallıq hökuməti fövqəladə hallar zamanı vətəndaşlara fərdi hazırlıq tədbirləri görməyi tövsiyə edib.
Kampaniya çərçivəsində sakinlərə hər nəfər üçün gündəlik 3 litr olmaqla, ən azı üç günlük (ümumilikdə 9 litr) içməli su ehtiyatı, tez xarab olmayan qida məhsulları, tibbi ilk yardım dəsti, fənər, ədyal, nağd pul və batareya ilə çalışan radioqəbuledici saxlamaq tövsiyə olunub.
Rəsmi qurumlar bildiriblər ki, böhran zamanı elektrik enerjisinin, su təchizatının, mobil rabitə və internet xidmətlərinin kəsilməsi, eləcə də logistik təchizat zəncirində ciddi fasilələrin yaranması riski mövcuddur.
Böyük Britaniyanın müdafiə naziri Ues Stritinq (Wes Streeting) Telford şəhərində yerləşən müdafiə sənayesi müəssisəsindəki çıxışı zamanı ölkənin üzləşdiyi müasir təhlükəsizlik risklərinə toxunub:
“Təbii fəlakətlər, mürəkkəb kiberhücumlar və dövlət dəstəkli hibrid təhdidlər fərziyyə deyil, real faktlardır. Rusiya və digər qeyri-dost dövlətlər vətəndaşlarımızın gündəlik həyatını təmin edən kritik infrastrukturu hədəfə ala bilərlər. Bu təhlükələr artıq uzaq coğrafiyalarda deyil, birbaşa bizim cəmiyyətimizin qarşısındadır. Ailələr və müəssisələr böhran anında necə davranacaqlarını əvvəlcədən planlaşdırmalıdırlar”, – deyə nazir vurğulayıb.
BBC-nin “Question Time” verilişində çıxış edən Stritinq daxili bazarda panikanın qarşısını almaq məqsədilə əlavə edib ki, hökumətin əsas məqsədi əhalini qorxutmaq deyil, ayıq-sayıqlığı artırmaqdır.
Öz növbəsində, Böyük Britaniyanın təhlükəsizlik naziri Dan Karvis (Dan Jarvis) vətəndaşların fərdi hazırlıq addımlarının xilasetmə və təhlükəsizlik xidmətlərinin yükünü azaldacağını diqqətə çatdırıb. Karvis oxşar böhran idarəetmə kampaniyalarının Fransa, İrlandiya və Niderland kimi Avropa ölkələrində də tətbiq edildiyini xatırladıb.
Xatırladaq ki, bu maarifləndirmə təşəbbüsü qlobal miqyasda PHP proqramlaşdırma dilində aşkar olunmuş kritik kiberboşluq fonuna təsadüf edir. Sözügedən kiberboşluq səbəbindən Böyük Britaniyada 32 dövlət xidməti portalının fəaliyyəti profilaktik olaraq müvəqqəti dayandırılmışdı.
