OMM Redaksiyası
Azərbaycan şahmatçısı Aydın Süleymanlı Monteneqronun Budva şəhərində keçirilən klublararası Avropa Kubokundakı çıxışını uğurlu hesab edir.
“Fərdi olaraq yarış mənim üçün qənaətbəxş keçdi. Karyeramda ilk dəfə özbəkistanlı Nodirbek Abdusattarov kimi səviyyəli şahmatçıya qalib gəldim. Bu səbəbdən düşünürəm ki, bu turnirdəki çıxışımı uğurlu qiymətləndirmək olar”, – Süleymanlı açıqlamasında deyib.
“Vüqar Həşimov” komandasında çıxış edən şahmatçı kollektivin nəticəsinə də münasibət bildirib. Onun sözlərinə görə, komanda daha yaxşı nəticə qazanmağı planlaşdırsa da, bu dəfə buna nail ola bilməyib.
“Uğurlu çıxış etmək istəsək də, 10-cu yerlə kifayətlənməli olduq”, – Süleymanlı qeyd edib.
“Vüqar Həşimov” kişi şahmatçıların yarışını 10 xalla 10-cu pillədə tamamlayıb. Klubun heyətində mübarizə aparan Süleymanlı şəxsi nəticələrinə görə birinci lövhədə bürünc medal qazanıb.
Qadınların turnirində Serbiyanın “Sirmium Sremska Mitrovitsa” və Azərbaycanın “Odlar Yurdu” klubları hərəyə 10 xal toplayaraq 3-4-cü yerləri bölüşüblər. Əlavə göstəricilərə əsasən, Azərbaycan klubu dördüncü olub. “Odlar Yurdu”nun şahmatçısı Gülnar Məmmədova dördüncü lövhədə qızıl mükafata sahib çıxıb.
