OMM Redaksiyası
Monteneqronun Budva şəhərində təşkil olunan şahmat üzrə klublararası Avropa Kubokunda ikinci turun görüşləri keçirilib. Azərbaycanın qadınlardan ibarət “Odlar Yurdu” komandası turnirin son qalibi, Monakonu təmsil edən “Cercle d'Echecs de Monte-Carlo” klubu ilə qarşılaşıb.
Görüş Azərbaycan təmsilçisinin 1:3 hesablı məğlubiyyəti ilə başa çatıb. Rəqib komandanın heyətində Hampi Koneru Gövhər Beydullayevanı, Stavrula Tsolakidu isə Günay Məmmədzadəni məğlub edib. Qalan iki görüş heç-heçə ilə yekunlaşıb.
“Odlar Yurdu” yarışın ilk turunda İsveçin “Wasa SK” komandası üzərində 4:0 hesablı qələbə qazanmışdı. Beləliklə, Azərbaycan komandası iki turun nəticəsinə əsasən bir qələbə və bir məğlubiyyət əldə edib, aktivinə isə ümumilikdə iki komanda xalı yazdırıb.
Klublararası Avropa Kuboku Budvada keçirilir. Yarışda Avropanın aparıcı şahmat klubları mübarizə aparırlar.
