Şəhriyar Məmmədyarov “Bayegan Pendik”in 5:1 hesablı qələbəsinə töhfə verib

Azərbaycanlı qrossmeyster Şəhriyar Məmmədyarov Monteneqronun Budva şəhərində keçirilən şahmat klubları arasında Avropa Kubokunda Türkiyənin “Bayegan Pendik Chess Sports Club” komandasının heyətində çıxışını davam etdirir.

Türkiyə klubu ikinci turda Serbiyanın “Srvena Zvezda” komandasını 5:1 hesabı ilə məğlub edib. 2710 reytinq xalına malik Məmmədyarov üçüncü lövhədə 2371 reytinq xalı olan təcrübəli qrossmeyster Suat Atalıkla qarşılaşıb və qələbə qazanıb.

“Bayegan Pendik” ilk iki turda qalib gəlib

Komandanın heyətində yeganə məğlubiyyəti iranlı qrossmeyster Məhəmməd Əmin Təbətəbai alıb. O, Temur Kuybokarova uduzub. Türkiyə klubunun digər beş şahmatçısı görüşlərini qələbə ilə başa vurub.

İlk turda “Bayegan Pendik” İngiltərənin “Blackthorne” komandasını 6:0 hesabı ilə məğlub edib. Həmin görüşdə Məmmədyarov Kris Dankana qalib gəlib. Beləliklə, Türkiyə klubu ilk iki turda keçirdiyi hər iki komanda matçını qazanıb, 12 fərdi partiyanın 11-də qələbə əldə edib.

İştirakçılarının orta reytinqi 2715 olan “Bayegan Pendik” turnirin əsas favoritidir. Komandanın heyətində Məmmədyarovla yanaşı, Aniş Giri, Rixard Rapport, Ediz Gürəl, Volodar Murzin və digər tanınmış qrossmeysterlər yer alır.

Avropa Kuboku oktyabrın 17-dən 23-dək Budvada keçirilir. Açıq kateqoriyada 108, qadınların yarışında isə 22 komanda mübarizə aparır. Turnir İsveçrə sistemi üzrə yeddi turdan ibarətdir. Üçüncü turun oktyabrın 19-da keçirilməsi nəzərdə tutulub.