“Vüqar Həşimov” uduzub, “Odlar Yurdu” Avropa Kubokunda qalib gəlib

Monteneqronun Budva şəhərində keçirilən şahmat üzrə Avropa Klublar Kubokunun dördüncü turunda Azərbaycan komandaları fərqli nəticələr əldə ediblər.

Kişilərin yarışında çıxış edən “Vüqar Həşimov” Rumıniyanın “SuperChess Romania” komandasına 2:4 hesabı ilə uduzub. Azərbaycan klubunun heyətində Aydın Süleymanlı dünya reytinqinin ilk beşliyində yer alan özbəkistanlı qrossmeyster Nodirbek Abdusattorovu məğlub edib. Bu qələbə komandasının ümumi məğlubiyyətinin qarşısını almayıb.

Qadınların yarışında “Odlar Yurdu” Almaniyanın “Kölner Şahfroynde” klubunu 2,5:1,5 hesabı ilə üstələyib. Dörd turdan sonra hər iki Azərbaycan komandası altı xal toplayıb. “Vüqar Həşimov” 12-ci, “Odlar Yurdu” isə altıncı pillədə qərarlaşıb.

Şəhriyar Məmmədyarovun çıxış etdiyi Türkiyənin “Bayegan Pendik” komandası yeddi xalla beşinci yerdədir. İsveçrə sistemi üzrə keçirilən və yeddi turdan ibarət turnir oktyabrın 23-də başa çatacaq.

Kontekst

Oktyabrın 19-da keçirilən ikinci turda “Odlar Yurdu” turnirin son qalibi, Monakonu təmsil edən “Cercle d'Echecs de Monte-Carlo” klubuna 1:3 hesabı ilə məğlub olub.