OMM Redaksiyası
ABŞ prezident administrasiyası Bağdaddan İranpərəst militant qruplara qarşı tədbir görməsini tələb edərək İraqa nağd pul göndərişlərini müvəqqəti olaraq dayandırıb.
"Operativ Məlumat Mərkəzi-OMM" xəbər verir ki, bununla bağlı xarici KİV məlumat yayıb.
Bildirilib ki, ABŞ həmçinin İraq ordusu ilə təhlükəsizlik proqramları üzrə əməkdaşlığı dondurub.
ABŞ Ədliyyə Nazirliyinin Nyu-York Federal Ehtiyat Bankındakı hesablardan İraq neftinin satışından əldə edilən təxminən 500 milyon dollarlıq əskinas daşıyan yük təyyarəsini yerə endirdiyi bildirilir.
Qeyd olunub ki, ABŞ 28 fevralda İrana qarşı hərbi əməliyyatların başlamasından bəri İraqa nəzərdə tutulan təchizatı ikinci dəfə dayandırıb.
Vaşinqtonun bu addımı İranpərəst milislərin Tehrana dəstək nümayişi olaraq İraqda və qonşu ölkələrdə ABŞ hədəflərinə hücumlarından sonra atılıb.
Vurğulanıb ki, Tramp administrasiyası Bağdada Vaşinqtonla daha sıx əməkdaşlıq etmək və Tehranla əlaqələri zəiflətmək üçün təzyiqi artırır.
