Afət Ziyadqızı
Yunanıstan mətbuatının məlumatına görə, Afina Milli Rəsədxanasının FireHUB məlumatları əsasında aparılan qiymətləndirmədə Konitsadakı Trapezitsa dağında avqustun 31-də başlayan yanğının sentyabrın 8-dək təxminən 8 min dönüm əraziyə zərər vurduğu müəyyənləşdirilib.
“Operativ Məlumat Mərkəzi-OMM” xəbər verir ki, yanğın əsasən Avropa İttifaqının müəyyən etdiyi təbii ətraf mühitin mühafizəsi şəbəkəsi olan “Natura 2000” ərazisində və Şimali Pindos Milli Parkının yüksək mühafizə statusuna malik ikinci zonasında təsirli olub.
Nəzarətə alınan yanğının bölgədə geniş əraziyə yayıldığı bildirilir. Relyefin sərt, meşə örtüyünün sıx və yol şəbəkəsinin məhdud olması yanğına müdaxiləni çətinləşdirib. Dağlıq ərazidə çalışan yanğınsöndürənlərə helikopterlərlə daşınan su çənləri çatdırılıb.
WWF Yunanıstanın Fəaliyyətlərin Koordinasiyası üzrə rəhbəri İlias Tziritisin qiymətləndirməsinə əsasən, yanğından ciddi zərər görən küknar və qara şam meşələrinin təbii yolla yenidən formalaşması 100 ildən çox vaxt apara bilər.
Tziritis yüksək dağlıq ərazilərdə baş verən yanğınların son illərdə daha geniş sahələrə yayıldığını vurğulayıb və bu cür yanğınlara daha erkən müdaxilənin vacibliyini qeyd edib.
