Afət Ziyadqızı
Fransanın cənub-qərbində yerləşən Landes vilayətində meşə yanğını ciddi fəsadlara səbəb olub.
“Operativ Məlumat Mərkəzi – OMM” xəbər verir ki, Luglon yaşayış məntəqəsi yaxınlığında başlayan yanğın artıq 1100 hektar meşə sahəsini əhatə edib.
Hadisə yerinə 500 yanğınsöndürən və 51 jandarma əməkdaşı cəlb olunub. Alovun daha geniş əraziyə yayılmasının qarşısını almaq məqsədilə ərazidə genişmiqyaslı tədbirlər görülür.
Landes valisi Gilles Clavreulun göstərişi ilə təhlükəsizlik məqsədilə bölgədə yaşayan təxminən 525 nəfər evlərindən təxliyə edilib.
Bundan əlavə, Luglon kəndinin şimal və qərb istiqamətində yerləşən iki əsas yol nəqliyyatın hərəkəti üçün bağlanıb.
Dünən başlayan yanğının dəqiq səbəbləri hələlik müəyyən edilməyib..
Məlumata görə, 57 vilayətdə “narıncı” təhlükə səviyyəsi elan olunub, 4 vilayətdə isə vəziyyətin kritik olması səbəbindən “qırmızı” alarm tətbiq edilib.
Qeyd edək ki, Fransada müşahidə olunan anomal istilər meşə yanğınlarının yayılmasını sürətləndirir. Cari il ərzində ölkədə baş verən yanğınlar nəticəsində artıq 117 min hektardan çox ərazi yararsız vəziyyətə düşüb.
