OMM Redaksiyası
Azərbaycanlı MMA döyüşçüsü Tural Rəhimov oktyabrın 30-da Tacikistanın Düşənbə şəhərində keçiriləcək “ACA 209” turnirində çıxış edəcək.
38 yaşlı idmançının rəqibi Rusiyanı təmsil edən Naşxo Qalayev olacaq. Yarım yüngül çəki dərəcəsində (65,8 kq-dək) keçiriləcək döyüş ilkin qarşılaşmalar proqramına daxildir.
Rəhimovun peşəkar karyerasında 22 qələbə və 10 məğlubiyyət var. Onun 34 yaşlı rəqibi 13 qələbə qazanıb, 10 dəfə isə məğlub olub.
Rəhimov daha əvvəl Yaponiyanın Rizin promouşeninin turnirlərində, o cümlədən Bakıda keçirilən yarışda iştirak edib. O, həmçinin ACA turnirlərində çıxış edib.
“ACA 209” təşkilatın 11 illik fasilədən sonra Tacikistana qayıdışını qeyd edəcək. Turnirdə ümumilikdə 17 döyüşün keçirilməsi planlaşdırılır.
Gecənin əsas qarşılaşmasında Tacikistan təmsilçisi Fəridun Odilov orta çəki dərəcəsində rusiyalı Artyom Frolovla üz-üzə gələcək.
