OMM Redaksiyası
Azərbaycanlı MMA döyüşçüsü Nihad Quliyev “Vendetta Fight Nights 52” turnirində uğurlu çıxış edib. Avstriyanın Baden şəhərində keçirilən yarışda Bred Vileri ilk raundda nokautla məğlub edən idmançı “Vendetta Fight Nights” Qran-prisinin növbəti mərhələsinə yüksəlib.
Bu qələbə ilə Quliyev peşəkar karyerasındakı rekordunu 6:0-a çatdırıb. O, Qran-prinin əsas mükafatı uğrunda mübarizəni davam etdirir.
Quliyev bildirib ki, döyüş planlaşdırdıqları kimi keçib, lakin komanda bəzi səhvlər üzərində işləyir. Onun sözlərinə görə, döyüşdən əvvəl hər üç raunda hazırlaşsalar da, qarşılaşmanı ilk raundda başa vurmaq planlaşdırılan ssenarilərdən biri olub.
Döyüşçü rəqibinin boks təcrübəsini nəzərə aldıqlarını və ayaqüstü mübarizədə öz üstünlüklərini göstərməyə çalışdıqlarını deyib. Növbəti mərhələdə qarşısına kimin çıxmasının fərq etmədiyini vurğulayan Quliyev ikinci və üçüncü mərhələlərdə də qalib gələrək çempion olmaq, kəməri Azərbaycana gətirmək istədiyini bildirib.
Quliyev məşqçi Ruslan Məmmədhəsənovun hazırlığı və komandanın əməyi sayəsində yüksək səviyyədə hazırlaşdıqlarını qeyd edib. O, karyerasının başlanğıcında olduğunu və mümkün olan ən yüksək nəticəyə çatmağı hədəflədiyini söyləyib.
