Afət Ziyadqızı
Birləşmiş Ştatların Prezidenti Donald Tramp Rusiya Federasiyasının Prezidenti Vladimir Putin və Ukrayna Prezidenti Volodimir Zelenski arasında üçtərəfli danışıqlar prosesinin yaxın vaxtlarda təşkil oluna biləcəyini bəyan edib.
“Operativ Məlumat Mərkəzi-OMM”-in Ağ Evin mətbuat xidmətinə istinadən yaydığı məlumata əsasən, ABŞ lideri bu barədə Texas ştatındakı mitinqdən sonra Vaşinqton yaxınlığındakı Endryus (Andrews) aviabazasına gələrkən jurnalistlərin suallarını cavablandırarkən bildirib.
Donald Tramp Rusiya-Ukrayna münaqişəsinin tənzimlənməsi üzrə danışıqlar formatına toxunaraq qeyd edib:
“Tərəflər dialoq imkanlarını nəzərdən keçirmək istəyirlər, buna görə də prosesin gedişatını izləyəcəyik. Düşünürəm ki, yaxın zamanlarda belə bir müstəvini təşkil edə biləcəyik. Görüşün mütləq şəkildə fiziki olaraq üzbəüz formatda keçirilməsi vacib deyil, digər alternativ və virtual diplomatik formatlar da mümkündür. Lakin hesab edirəm ki, bu təşəbbüs kifayət qədər tez bir zamanda reallaşa bilər”.
Rusiya Prezidenti Vladimir Putin daha əvvəl dəfələrlə bəyan edib ki, Moskva Ukraynadakı hərbi əməliyyatların sülh yolu və siyasi-diplomatik vasitələrlə dayandırılmasında maraqlıdır. Rusiya tərəfi danışıqlar masasına oturmağa hazır olduğunu, lakin Kiyev rəhbərliyi tərəfindən analoji adekvat hazırlıq və iradə görmədiyini vurğulayıb.
Öz növbəsində ABŞ Prezidenti Donald Tramp da Kiyev administrasiyasının mövcud mövqeyindən razısızlığını ifadə edərək, Ukrayna rəhbərliyinin sülh tənzimlənməsinə nə dərəcədə hazır olduğunu sorğulayıb. ABŞ lideri əvvəlki bəyanatlarında Rusiya ilə konstruktiv razılaşmalara nail olmağa qadir olan siyasi yanaşmanın vacibliyini diqqətə çatdırmışdı.
