OMM Redaksiyası
Azərbaycanlı peşəkar boksçu Seymur İsayev özbəkistanlı İsrail Madrimovla döyüşəcək. Qarşılaşma oktyabrın 30-da Daşkənddəki “Humo Arena”da baş tutacaq. Döyüşün keçiriləcəyini Özbəkistan Peşəkar Boks Federasiyası açıqlayıb.
“Grey Wolf” ləqəbi ilə tanınan İsayev güclü zərbələri və vaxtından əvvəl qazandığı qələbələrlə seçilir. O, peşəkar karyerasında UBO versiyası üzrə dünya çempionu olub.
Madrimovun karyerası
Madrimov 2024-cü ilin martında Maqomed Qurbanovu beşinci raundda texniki nokautla məğlub edərək ilk orta çəkidə WBA dünya çempionu titulunu qazanıb. Özbəkistan təmsilçisi daha sonra Terens Krouford və Vircil Ortizlə qarşılaşıb.
O, 2026-cı ilin yanvarında rinqə qayıdıb və Luis David Salazara xallar hesabı ilə qalib gəlib.
Peşəkar boksa başlamazdan əvvəl Madrimov həvəskar səviyyədə də uğurlar əldə edib. O, 2018-ci il Asiya Oyunlarının qalibi, 2017-ci il Asiya çempionu, 2014-cü il Asiya Oyunlarının isə 75 kq-dək çəki dərəcəsində gümüş medalçısıdır.
Madrimov peşəkar karyerasında ilk orta çəkidə “WBA Inter-Continental” və “IBF Inter-Continental” regional kəmərlərini də qazanıb.
